"Blonde" og "Shaggy Tassel Scarf Pattern"

Gode venninner veit å gleda ein med gåver som fell i smak. To slike gåver vil eg dela me dåke no når eg har hatt gleda av å strikka dei. Gleda over dei vil eg ha lenge, for gode i bruk er dei begge.

Først til eit nøste "Fin" frå "Du store alpakka", og fargen var selvfølgelig nydelig lilla. Saman med nøstet var det 2 mønster til pulsvantar. Eg valde å strikka "Blonde" av Pinneguri, eit gratismønster du finn på Ravelry.

Eg likar pulsvantane litt lange, la difor opp 40 masker på pinne 2,5 mm. 5 mønster passa perfekt i vidda til meg i dette garnet. Deilig garn, flott farge og fint design gjer at desse pulsvantane kjem til å verta mykje brukt.

Den andre gåva var ein kit frå Adeles Mohair i Sør-Afrika. 3 nøster med deilig mohair bouclegarn, 2 stykker med ferdige frynser og eit mønster. Og frynsene var av ulike garntypar og kvalitetar. Lilla i ulike nyansar gav dei eit fint fargespel.

Sjølv om bouclegarn ikkje er av dei raskaste å strikka, gjekk det greit å strikka sjalet. 30 masker fram og tilbake i rillestrikk krev ikkje mykje tankeverksemd. Likevel måtte eg ta opp ein del. Utruleg kor fort maskene forsbvann, 30 masker vart til 27? Måtte no litt konsentrasjon til likevel.

Men resultatet er eg svært fornøyd med. Eit varmt og godt sjal med god lengde og fylde. Kanskje meir eit utesjal enn eit ein brukar innendørs. Men jammen er det godt med noko lunt i halsen. På klehengaren kjem det gjerne litt betre fram korleis størrelsen er. Fargen er vel ein stad midt i mellom dei to bilda.

Tusen takk til dåke som ser innom bloggen min, sette veldig stor pris på desse besøka. Vil ønskja dåke alle ei riktig god påske!

Veving på vent - no er våren her!

Eg likar godt å veva, men det går litt i bølgjer. Dessuten er det vanskeleg å rekka over al teg vil. Der eg har vevd litt i det siste er i vevgruppa i husflidslaget. Vevgruppa er ein triveleg møtestad der vi er saman mandag på dagtid og torsdag på kveldstid. Det er då mogeleg for alle å delta, sjølv om ein er i arbeid.

Men trur eg må seia at mandagsøkta med ein god felles lunsj er ei av høgdepunktene i veka. Det å sitja over eit deilig "smørremåltid" og drøsa om alt og ingenting er herlig saman med trivelege damer. Å laga lunsj går på omgang, så vi får vera gjester mange gonger mellom kvar gong vi lagar til.

Det siste eg har vevd der er ein løpar med lilla lin i innslag på lys grå renning. Har tenkt dette som ein adventsløpar til spisebordet. Veit eg er ute i god tid, men kan ikkje klippe ned løparane ein og ein. Men når våren, ein god sommar og fin haust er over, då skal denne løparen ferdigstillast.

Noko av det som er veldig fasinerande med veving er at same renninga kan gje forskjellig resultat når ein bruker forskjellig innslag og trøing.

Under er det løparar frå den første renninga til løparar eg sette opp på veven heime. Det er ei raud cottolinrenning med naturfarga striper og med lin til innslag. I innslaget har eg brukt litt ulik type naturfarga lin  i tillegg til raudt.

På vevgruppa i husflidslaget sette vi opp same renninga i kvit og naturfarga cottolinrenning med svarte striper. Her slo vi oss meir laus med innslagsfarge og trøing, og første nedklipp kan du sjå under.

Og eg tilstår, eg er svært fornøyd med min løpar. Kjekt å ha den liggjande på salongbordet!

No gleder eg meg til det igjen vert ein ledig vev i vevgruppa, så eg kan prøve meg på noko nytt. Elles er jo målet å setja opp ei ny renning heime til hausten. Er liksom ikkje like freistande med veving no når våren er her.

Ei lita maskinstrikka jakke

Å strikka på maskin er nok ikkje så enkelt som eg trudde, men læra det skal eg. Må seie sjølv at eg er rimeleg tolmodig, og det kombinert med litt staheit så må eg vel lukkast. For ikkje å leggja for mykje til, heng gjerne tolmodigheita saman med handarbeidsinteressa.

Å strikka på maskina går greit, det er berre å føra "sleden" fram og tilbake, det. Men så skal det aukast, fellast, strikkast mønster, moglegheitene er mange.......

Men det er då det gjerne skjer, arbeidet hoppar av og ligg på golvet eller masker raknar nedover eller..... eller........

Har sikkert ikkje gjort alle nødvendige erfaringer enda. men eg vil påstå at eg lærer av feila mine. Likar jo ikkje å starta på nytt opptil fleire gonger for å strikka ei lita jakke? Men no er jakka ferdig og tatt i bruk. Synes sjølv ho vart ganske fin, pynta ho med knappar eg kjøpte i Cognac, Frankrike sist sommar! 

Tenkte dei kunne vera til eit lite plagg til den vesle prinsessa vår

Synes den vesle klehengjaren som jakka heng på er søt. Det er ein frå min mann sin barndom, handmala og forseggjort. Kjekt å kunne ta vare på slike gamle ting og bruke dei.

For å øve på auking og felling strikka eg eit trekantsjal av nokre restar Kauni. Maskina tok dette garnet greit, så her skal nok garnlageret krympast litt til hausten. Liksom ikkje årstida for store prosjekt enno. 

På ein garnbutikk fekk eg til råd at Kauni ikkje skulle vaskast, for det krympa????? Det synest eg høyrdest rart ut når det står 30 grader handvask på bandolæret. Dei meinte det var betre å gje plagget eit oppkok i reint vatn, eventuelt med ei teskje eddik fro å binde fargen. Det er viktig at plagget ligg heilt i ro og at det vert avkjølt i vatnet før det vert rulla inn i handdukar. 

Plagget skulle då verta mjukt og godt. 

Dette rådet prøvde eg på dette sjalet, og må sei at resultatet vart bra.

Strikka vårkåpe

På vår vesle tur i haust kjøpte eg noko garn hos Strikk Innom som ligg utanfor Kragerø. Garnet hadde eg berre lest om, men det freista så mykje at eg overtala mannen til å kjøra ein del ekstra for at eg kunne realisera draumen om dette garnet. Er du i nærleiken, kan eg absolutt anbefale eit stopp i denne butikken med eit litt uvanleg garnutval og service langt over det som kan forventast. Jau, her vil eg gjerne tilbake her!

Her på trappa utanfor butikken, god parkering hadde ho og. Det var god råd å få parkert bubilen, noko som ikkje alltid er like lett.

Her frå ei av garnhyllene, romslig butikk med god plass gir mulighet til å riktig studere garn og kvalitetar.

Det var mange saker som gav inspirasjon - ja til og med fristelser! Her frå ei korg ved kassen. Må tilstå eg har ei av desse hespene til modning.

Lurer du no på kva garn det var? Jau det var Cascade 220 superwash i ein fin ubleika farge. Garnet er i 100 gramsnøster. Det synes eg er ein stor fordel, vert så mykje mindre trådfesting då. Det har tjukkelse og strikkefastleik omtrent som Falk og Smart, med andre ord ikkje heilt tynt men heller litt tjukt etter min målestokk.

Hadde ein liten plan, men den vart endra undervegs. No er halvparten av garnet brukt, og eg har strikka ei lita vårkåpe til barnebarnet som vert 1 år på laurdag. Mønsteret er frå Hjemmet nr 44/2009, opprinneleg eit Sandnesdesign strikka i Smart. Mamma strikka denne kåpa til eit anna oldebarn, og eg fall så pladask for kåpa at eg bestemte meg for at den skulle eg og strikka.

Her er eit nærbilde av krage og knappestolpe, synes detaljen med fletter på bråtet på armane er ekstra lekker

Her er kåpa framme, med fletter og rettstrikka felt som vert smalare oppover på bolen.

Detaljbilde frå ryggen med eit rettstrikka felt som går over i ei flette, ein lekker liten detalj på dette plagget.

Kåpa sett bakfrå på mottakaren, litt ustø enno når ho går. Har berre stabba av garde i vel ei veke, men veldig fornøyd over å kunne oppdaga "verda" oppreist og på eiga hand.

Ei lita bedårande prinsesse i den nye kåpa, er det rart eg smeltar kvar gong vi er saman. Jammen er det sant at barnebarna gir eit nytt perspektiv på livet! Og vi er heldige og har fire barnebarn.

Ny strikkemåte

Tusen takk til alle dåke som ser innom mine handarbeidsbloggar. Eg plukkar på, sjølv om det innimellom går litt i bølgjer med innsatsen. Ønskjer dåke ein fin dag!

Å prøva nye ting er noko som eg lett lar meg freiste til, og ein draum har vore å prøve meg på å strikke på maskin. Å kjøpa brukt maskin her ikkje vore så enkelt, dei er ofte dyre. Men med gode vener ordnar det seg. Sølvi har vore så grei at ho har låna meg si maskin, og med å bytta ein slitedel er eg no i gang. Det vil seia, det vert nok å rykka tilbake til start innimellom. I husflidslaget har vi ei kreativ og særs hjelpsom dame, ho er mentor og inspirator for dette prosjektet mitt.

Men no har eg klart å fullføra det første prosjektet mitt, og det er eg litt kry for. Eit trekantsjal til veslegullet som skal byrja i barnehage 1. mars. 2 restar med babygarn vart til dette sjalet.

Nye tøfler trengte også den vesle prinsessa vår, og eg prøvde meg på eit par nye tovetøflar etter oppskrifta til Marte Helgetun som eg har strikka før. Denne gangen brukte eg Ask Hifa 2 frå Hillesvåg ullvarefabrikk. Dessverre vart dei litt store, men då vil dei passe til hausten. Har derfor ikkje somla meg til å ta på latex under foten, men det er planen. Så då får eg prøve meg på eit anna par som kan bli passeleg no. Har ein ide som ligg på vent, så det får eg komma tilbake til.

Innimellom må eg ty til litt labbestrikking. Då vart 100 gram Fotnote frå Mauds garn til desse to para med labbar. Deilig garn av 70 % merino superwash, 15 % silke og 15 % bambus.

I tillegg held eg på med eit evighetsarbeid, men det skal dåke få ein titt poå ein annan dag.

Litt vinterstrikk.

Det kan kanskje virke som eit paradoks å strikke varme vinterting med den vinteren vi no har. Ikkje eit snøfnugg å sjå, berre tørt grass eller store dammar, Heldigvis har vi ei hytte på fjellet vi brukar innimellom. Førre helg då vi var der, var der både snø og kulde, ja til og med i meste laget. -10 grader og kuling gjorde det til ei koseleg innehelg.

Med tanken på kalde skiturer har eg strikka denne halsen til meg sjølv. Deilig og mjuk og ikkje minst varm og god. Dette garnet fekk eg i gåve på eit treff eg var på i Trondheim i fjor vår. Det er handspunne og har vore ein skatt eg måtte laga noko lekkert til meg sjølv av. Eg ville helst ikkje blanda det med kjøpegarn, synest ikkje det ville vera rett. Mønsteret laga eg etter kvart som arbeidet skreid fram. Starta oppe, strikka så nedover og auka som til rundfelling. Har alt tatt den i bruk og den er deilig på kalde og vindfulle dagar.

Mannen min ønska seg ei ny strikkehue. Tidlegare har eg strikka fleire J.C. huer, ei slik vart denne gangen og. Wenche Roald sin norske oversettelse er ei god hjelp, den finn du her. Garnet eg brukte er Hjerte frå Hillesvåg Ullvarefabrikk. I det garnet og på pinne 2,5 la eg opp 140 masker.

Garn frå Hillesvåg er også brukt i desse tovevottane til min kjære. Trollgarnet derfrå er godt å tove og slitesterkt. Mønsteret eg har brukt har eg utarbeida sjølv for mange år sidan, både små og store synes det er gode vottar å bruke.

Kor mykje dei har krympa i toveprosessen visar på bilda over. 10 cm på lengda og tilsvarande på bredda gjorde dei akkurat passeleg. Då har eg vaska dei to gonger på vanleg vask på 40 grader og saman med ei dongeribukse. Slike vottar er suverene på kalde dagar når ein har vindvottar utanpå! Kvalitetsstempelet kjem frå ein erfaren kar som har vore snøholeinstruktør på Finse.

Med labbar på pinnane!

Trur så absolutt at dette er tida for å starte med litt blogging igjen. Nesten flaut at det er så lenge sidan eg har brukt bloggen min, men slik kan det nok bli til tider. Sidan sist er både advent og jul, ja til og med januar unnagjort, og vi går våren i møte. Deilig å tenkja på at det skal spire og gro, fargane skal komma igjen etter ein ganske grå vinter utan snø.

På handarbeidsfronten har det gått mykje i labbestrikking her hos meg. Nokre par på bestilling, andre som gåver. Ja nokon hamnar til og med i kassen med ferdige produkt. Boka  "sokker" av Bitta Mikkelborg har vore ei inspirasjonskilde når eg heiv meg over lageret med labbegarn.

Sheppards sokker strikka eg i Hakkespett frå Dalegarn. Dei er i str 45, og sat so støypt på foten til mottakaren. Ein liten rest vart til eit par små barnelabbar, ei gåve eller basargevinst ein gong i framtida. Desse sokkane skal eg strikke fleire gonger, men då i einsfarga garn. Mønsteret forsvinn litt i dei spraglete fargane. Likevel er det mykje kjekkare å strikka mønster enn berre vanlege labbar.

To par av "Motorsyklistens pensokker" har eg strikka og. Det eine paret i grått forsvann ut døra før eg hugsa ta bilete av dei. men ein glad mottakar likte dei godt. Paret under er strikka i Lana Grossa Mielenweit. Eit deilig og mjukt garn av 80% Merino og 20% polyamid. 100 gram rakk til både eit par i str 38 og eit par barnelabbar str 23. Ein liten lilla rest vart til eit par i str 22.

Litt Sokkegarn frå Hjertegarn var akkurat nok til "Glød" i str 37. Vanskeleg å få fram det fine mønsteret på bilete. Dette er også eit mønster eg skal strikke fleire gonger. Dei sat så godt på foten, og strikka i tynt garn kan dei vera ok å få ned i sko og.

Og medan eg har strikka desse og ein del par til har eg øva meg på å strikka labbane på "Magic Loop". No når eg har fått dette inn i fingrane kan eg ikkje tenkja meg å strikka einsfarga labbar slik. Begge ferdig samtidig og eg slepp å telja for å få dei like store. I tillegg er det supert når eg strikkar opp restar eller lurer på om eg har nok garn.

Men eg skal tilstå eg har ikkje berre strikka labbar, men det skal de få sjå i ein anna blogg. Og eg har lova meg sjølv at det skal ikkje bli like lenge mellom bloggane framover!